a-dro

A-dro dhe’n blog ma

Hebm yw blog personel, puptra obma yw po yn Kernowek, po a-dro dhe Gernowek, nepprys an dew, treweythyow na eyl na gila. Tabm niwlek? Mir orth an kynsa erthygel.

A-dro dhymmo

Duncan henwys ov ha megys yn Pednwydh veuv. My a dhallathas omdhyski Kernowek y’m degow. Trigys ov lemmyn yn Kardydh gans ow hespar neb yw Kernoweger ynwedh. Yma nebes Kernowegoryon erel a-dro dhe Gardydh, nebes anedha a welav yn-fenowgh. Yma dhyn Yeth an Werin misek keffrys (gwel obma rag kedhlow). Ytho, kyn nag esov yn Kernow, feusik lowr ov y hallav spena meur a’m termyn ow kewsel Kernowek.

Udnweyth po diwweyth pub mis y’m klewir dre BBC Radyo Kernow, ow lenna y dowlen seythennyek, An Nowodhow, avel udn a’n bagas a skrif hag a lenn an dowlen. Pan nag esov vy ow kul taklow Kernewek, yth esov vy ow kul taklow artek/desin grafek, ow seni piano (po y dhyski dhe’n lyha), ha bos gwre’ti.

Noten lytherennans

An Kernowek usys y’n blog ma, yn orgraf Furv Skrifys Savonek (FSS) yw skrifys, marnas menegys ken. My a dhevnydh grafow ‘main’ (k, kw, hw etc), a-der kasys treweythus (ny allav vy devnydhya ks rag x, ytho an rebellyans munys na a omallowav vy). Ow gramer ha’m gerva dre vras yw Kernowek Kres (awos ow dyski dre Unys ha KK), gans arliw byghan a Dhiwedhes. Dre happ yw ow rag-occludyans – my a vlam an bysowek a’m jydn-amontyer.

Taklow teknek

An wiasva yw drehevys dre WordPress. An thema yw ‘Tracks’ gans Complete Themes, gans chanjyansow CSS genev. Trelyansow Kernowek a veu gwrys dre wolegi restrennow .po/.mo dre dhevydhya a Poedit. An wiasva a dhevnydh plugin Polylang rag skwychadowder yeth, ha genev yw an treylyansow Kernowek. Wortiwedh y hwrav vy folen gans moy kedhlow fatel worris vy oll warbarth; mars eus bern genes yn y gever ha hedna ow kortos, kestav vy.