HVAMMSTANGI

Bardhonieth andreylyadow hag ilow trist dhyworth ynys yeyn, diskudhys yn kibel booth.

Read this article in English.

Ilow a woslowav y’n gibel.

Tabm kyns Nadelik, yth esov ow kasa Spotify dhe dewlel taklow chonsus orthiv. Yntra shampou ha condicyoner, lev a glewav a dhalleth redya bardhonek. Nebes linennow a-ji dhodho, keveylyans piano ispoyntel trist a dhalleth. Sewys yw gans kerdyn a omvoghha yn tov war-tu ha’n diwedh.

Wortalleth, nyns ov vy sur yn tien yn py yeth yw an barthonek. Y tismygav y vos Skandenaviek, awos ow bos tennys gans ilow gwerin Skandenavek y’n eur ma (Swedek yn arbennek), ha taklow konnyk kepar ha Spotify a dewl moy an keth orthis. Y’n gibel yn arbennek.

Herwydh usadow dhe’n kabm ma, y hworsen vy dhe ober ow thowlen henwel yeth Skandenaviek brysel, hag yw henwel yethow dres dowlennow Skandenaviek (Broen, Borgen, Ófærð). Byttegyns, temmik tewlys ov, awos pols, yth omglew kepar ha Kernowek.

Praga? Wel, awos dew acheson: udnweyth yn bardhonek, yth omglew dell lever a gwas “growan, sten”. Yma keffrys neppyth a omglew kepar ha ‘blewen’. An nessa acheson yw dell omglew y lev tabm kepar ha’n huni Mick Paynter.

Nyns yw drefen Rewenesek dhe omglewes kepar ha Kernowek, yth yw awos gallos hudel Kernowek dhe omglewes kepar ha yethow erel yn ken desedhansow. Devri, unnik torn vytholl re wovynnir orthiv a-dro dhe’n yeth a gewsis vy, an dismyk ansur o ‘Danek?’

Neb fordh, teg o an yeth, an bardhonek, ha’n ilow, ytho klewes nebes an radnyeth kewsys war or Pednwydh/Húnaþing yw gwiw ragov vyvy.

An hyns yw dhyworth Islands, albom gans ilewydh Rewenesek Ólafur Arnalds. An albom a syns hynsow rekordys yn tylleryow a-dro dhe Rewenys. Hyns a woslowis vy yw an kynsa, hag a veu rekordys yn Hvammstangi, treveglos arvorek yn Rewenys north west, war an Miðfjörður. An prydydh yw Einar Georg, neb usi ow redya onan y vardhegow. Nyns eus treylyans proviys gans an ilewydh, ytho my a’n gas pesya ‘vel andreylyadow, y’m pedn vy dhe’n lyha.

An hyns re beu meurgerys genev dres an Nadelik ma, hag a furvas radn an gilva, ow teudha yn ta gans kerdhow hebask a-hys arge Baya Kardydh yn kynsa dedhyow a’n vledhen nowydh. Ha hey, my a dhismyk tebmik a-dro dhe dreveglos Rewenesek pell, keffrys ha kavos erthygel nessa anodho.

Yma nebes moy a-dro dhe’n albom obma, hag ottomma an hyns – gwydhyow sessyon rekordyans yn Hvammstangi:

 

 

Imach gwartha: Wikimedia Commons

Erthyglow a-dhiwedhes

Kovskrifennow

Udn kampol

  1. Peter J
    26 Genver 2017
    Gortheb

    Pur wheg, nebes haval dhe Adagio rag cordennow Barber martesen.

    0:35 – growan, sten! my a’n clewas (po my a’n cammglewas kepar ha ty) ynwedh. Da via godhvos an geryow gwir ha’ga styr. Resek a wre an geryow na.

Daslever

Ny vydh dha drigva ebost dyllys.