LIA

Donald Trump yw Lewydh Statys Unys.
Pes y leverel. A welydh?
Jedi ywa. Displegyans unnik yw.

Dy’Gwener my a welas y teu ha bos Donald Trump 45ves Lewydh an Statys Unys.

Hebm o an seythves etholans SU a sewis vy hag awos bos lebmyn blog genev, y talvia y dhevnydhya dhe brofya ow dielvennans, po martesen nebes kevrennow tanow orth Kernowek. Ytho:

Areth Trump a yssynsas, yn arayys varys, an lavrennow blood of patriots, America first, national pride, protected by God and when America is united, America is totally unstoppable. Rag may hyllir fondya manylyon a vri…

…na. Ny allav. Re euthyk yw. Res yw dhymm dalleth arta. Pana gen a leveris?

Wel, y fydh ev ow kul Amerika Krev Arta, Golusek Arta, Prout Arta, Salow Arta, ha dres oll, Meur Arta. A ny ladra va hedna dhyworth Moulin Rouge? Po o hedna a-dro dhe ‘Gwiryonedh, Tekter, Rydhses, ha dres oll, Kerensa’? Na. Hedn a dhiwedh ynwedh yn trog – Nicole Kidman a dhorn Ewan McGregor marow gans jynn-skrifa koth. Diharesow a’n spoyler. Fatell a-dro dhe hebma:

to unlock the mysteries of space, to free the Earth

Molleth Duw an komma na! Bes dhe vos onest, pub torn y hwelav Mike Pence, my a wra klewes hebma:

(Hedn yw hebma). Da lowr… Star Wars. Gwren ni mos alena.

Nans yw termyn hir, yn galaxi pell alebma… den a dhiyskydnas jynn-yskyn hag y leveris y hwre va resek rag lewydh, ha pubhuni a hwarthas.

Tabm ha tabm y teu ha bos moy kepar ha fylm drog. Trump a feth y lies erbynner Repoblekanek. Y dhewdhorn munys a lesk y sabre-golow, hag y tregh yn-nans Little Marco, Lyin’ Ted ha’n erel. Ny allav vy mires yn-mes. Yth esov vy ow resek war tu ha’n etholans yn Millennium Falcon gans pubonan erel.

Dhana, Bernie Kenobi a hanas y’m skovarn “nyns yw hedna etholans vyth, gorsav efanvos yw!’ Ha stag yn y dewyn-tenna, ha tednys ov a-ji dhe hullaetholans Steren Ankow planetas y vraster. Bernie yw sakrifiys rag may fo gallosekka Hillary Clinton. Mes ena Hillary Clinton a gyv anwos-efanvos hag y kodh yn-nans. Ryb karr.

Distowgh, dewyn govenek! Keffrysyans Rebel a gyv gwander y’n Steren Ankow. Sonskrif kostennys yn poran, a dhisplek fatel dhevnydh Trump an nerth. Heb dout y hwra distrui y gaskyrgh? Na? Pubhuni a ankev yn y gever. Yn y le, i a drov nebes ebostow nowydh a stoffyas Clinton a-ji dhe R2D2, ha pubonan a gows y’ga hever y’n dydhyow gesys.

Ple’ma’n banjo?

Ha dres an nos hir 8ves a vis Du, Steren Ankow a dreusfurv dhe doll du, orth ow sugna, dha sugna ha sugna pubhuni oll dres y worwel hwarvos. Pell yn y gastel yn Moskow, an Mester, (obma le gwas yn rob skeusek, ha moy kepar ha kyns-hunk owth orsomdewlel dhyworth versyon fylm porn kethreythel 1970s a Deliverance), a skrynk yn tison. Hag yth omdewl ors aral.

Y hwayn. (Trump ha’n etholans hedn ywa, na Putin ha’n ors.)

Ha dy’Gwener, dhe 5pm, y teuth an tecken. Radn an hwedhel may teu ha bos Lewydh. An Lewydh gwir. An Lewydh gwir a’n Statys Unys gwir. An jydh Anakin Skywalker a worras an basnett bras ha du a-dro dh’y bedn.

Ymons i oll yn-rag an Capitol. Yma Mike Pence ow skrinkya dell re dhistruis Alderaan. Melania druan a hevel namna wra hi dybri kalgh gavar war I’m a Celebrity. Yma hembrenkyades Rebel fethys mes defiek Clinton ow kwiska yn gwydn, mes y hwor na vydh hi y’n sequel.

Distowgh, poran ha Trump ow korra y leuv war vibel y deylu, ymava treusperthys dhe enys gwyls yn Enesow Howlsedhes. Ev a vir a-dro dhodho hag y’n niwl, y hwel benyn henavek ha kuv, tweed Harragh a-dro dhedhi.

Hi a gews, mes Trump ny’s konvedh. Yma besjon skav, tallytherennow ow chanjya yn hudel, dell wrello bord dibarthow terrys dhe Lasgow Central. Koynt yth omglew an yeth, ow kemyska gans an hanasow y’n awelyow a hwyth a-hys an arvyow Atlantek.

Y tisliw an welesigeth. Delergh yma Trump war risyow an Capitol.

Ha lebmyn oll yw gwrys. Lewydh yw Trump. Keltek o mabmyeth y vabm hag yth ywa lebmyn ‘hembrenkyas bys rydh’.

Brewys yw an Keffrysyans. Marow yw Penseviges Leia, hag yth on ni oll kyjys.

 

Imach gwartha: Wikimedia Commons; Putin kremlin.ru/WikiMedia Commons

Erthyglow a-dhiwedhes

Kovskrifennow

3 kampol

  1. An Doctour
    25 Genver 2017
    Gortheb

    Hahaha, marthus dres eghen! Me a’n redyas ma’s lebmen ha pur dha ew genam. Fia va gwell mar na pia gwir, bettegens T_T

  2. Peter Jenkin
    26 Genver 2017
    Gortheb

    Ea.

    Yow Duncan!

    Tamm wharth 🙂 yn tor’ nowodhow yeyn yw tybyans an screenplay na.

    Res yw dhe bobel vas bos war yn pub le. Rag sampel, ha Mr Johnson ow cowsel a “punishment beatings” agynsow, pyw y’gan media ni a wrug cows yn y gever hag a-dro dh’y istori gans scattyans kessydhyans y honan?

    Pyw? Ottomma! Bythqweth ny leveris esel “agan” media vyth ger vyth. :-/

    Governans nowydh an Statys Unys a alsa dysky tra po 2 dhyworth agan governans ni ow tochya gowleverel ha braggya, yth hevel dhymmo vy. Byttegyns, gwayt ma na wrello, ha, wostiwedh, dre liklod ny’n jeves edhom a’n par na! 😀

    Kebmer gwith, PJ

Daslever

Ny vydh dha drigva ebost dyllys.