ÜNKORN

Read this article in English.

 

Dydh da. Ünkorn a’th tynnargh.

Hebm yw blog personal, yn Kernowek ha Sowsnek.

Yma dew amkan dhymm. Kynsa yw y skrifav erthyglow yn Kernowek, a-dro dhe bypynag a’m deur. Pubonan a gews Kernowek hedhyw (my keffrys), a wor y gewsel gras dhe dermyn ha hwel a erel. Seul voy taklow kavadow dhe redya, ha seul dhivers, dhe wella.

Arbrov yw ynwedh. Yma tybieth dhymm an gwreydhennow a lies tra a’m deur dhe dhalleth orth ow bos sordys gans Kernowek avel flogh. Ytho didheurek vydh gweles an themys a dheu ha bos kebmyn. Wel, didheurek dhymmo vy dhe’n lyha.

Nessa yw y fynnen vy skrifa a-dro dhe’n yeth y honan. Arbednek yw Kernowek, ha nyns yw hebma ragvreus personel hepken. Lies yeth yw kellys dres istori, yw trist mes nag yw ankebmyn. Boghes anedha yw dasserghys dre dhegre sewena vytholl, hag yw an istori anusadow a wra Kernowek pur dhihaval. Ytho y fynnen vy keworra ow gwelva vy rag les a bobel yn-mes gans bern, yn arbednik an re usi ow prederi a-dro dh’y dhyski. Mes yndelna yth yw – saw ow gwelva ow honan.  Nebes ahanowgh a wra prederi ken, ha da lowr yw hedna.

An hanow

Re dhewis vy henwel an blog ma Ünkorn. An myns a dermyn a spenis vy dewis lytherennans Kernowek a lever meur a-dro dhe Gernowek (ha heb dout moy yn ow hever). Afinus yw an dyjynow, tabm hireth a Gernowek Unys may tallethis vy dredho.

Praga unkorn? Wel, niwlek, whimsek, keffrys ha tabm gocki. Ynwedh yth yw onan a 961 ger y’n Vocabularium Cornicum, an a-varra ober (a vraster vyth) y’n yeth, moy ‘es mil bloodh lemmyn. Da yw genev an tybyans a’y esedh y’n kilva dres vyaj oll, ow mires yn tawesek orth Kernowek ow holya y hyns dres an kansvledhynnyow.

Heudh redya.

 


Imach gwartha: ‘Yma dhe’n wyrgh jentyl ha prederus gallos dova an unkorn‘; freskliwans, lycklod gans Domenico Zampieri, c1602 (Palazzo Farnese, Rom)/Wikipedia

Erthyglow a-dhiwedhes

Kovskrifennow

Bydh an kynsa dhe gampolla

Daslever

Ny vydh dha drigva ebost dyllys.